Гутереш го повика светот да не подлегнува на „голата алчност“ на интересите поврзани со фосилните горива
Генералниот секретар на ОН Антонио Гутереш денеска на самитот за климата на маргините на годишната сесија на Генералното собрание на ОН во Њујорк, рече дека времето за справување со климатските промени истекува, делумно и поради „голата алчност на вкоренетите интереси кои собираат милијарди од фосилните горива“.
Гутереш апелираше до политичарите да ги засилат напорите за постепено отстранување на овие извори на енергија што ја затоплуваат климата. „Транзицијата од фосилни горива кон обновливи извори на енергија се случува, но заостануваме со децении, рече тој на почетокот на состанокот.
– Мора да го надополниме изгубеното време во влечкање, убедување и голата алчност на вкоренетите интереси кои собираат милијарди од фосилните горива, нагласи Гутереш.
– Многу од најсиромашните нации имаат целосно право да бидат лути. Лути затоа што најмногу страдаат од климатската криза која не ја предизвикаа. Лути што ветените финансии не се остварија. И лути што нивните трошоци за задолжување се високи. Ни треба трансформација за повторно да ја изградиме довербата, подвлече генералниот секретар на ОН.
Се очекува на состанокот да зборуваат претставници од 34 земји кои преземаат силни акции за климатските промени, вклучувајќи ги Канада, Пакистан, Јужноафриканската Република и островската држава Тувалу, како и Европската унија.
Прв требаше да зборува бразилскиот претседател Луис Инасио Лула да Силва, но се повлече поради здравствени причини. Бразилскиот министер за животна средина ќе зборува подоцна денеска.
Најголемите загадувачи во светот, САД и Кина, не беа поканети да зборуваат, иако специјалниот претставник на САД за климатски промени, Џон Кери е меѓу присутните. Кинеската мисија во ОН сè уште е без коментар.
