Секаде каде што може да се случи театар се чувствувам слободно и исполнето
Актерка, авторка на перформанси, водител, хуманист, едукатор за деца и млади,… Енџи Николоска е од се по нешто – спој на талент, амбиција, креативност и напорна работа! Оваа недела разговараме со девојка која знае да истури вистинска бура од емоции на сцената!
За почеток одиме со најтешкото прашање: „Која е Енџи“?
–Како за во 8часот наутро, навистина е тешко прашање хахахаха
Енџи е девојка со пастелно-бела коса, понекогаш (не)мирна, неуморна, желна за работа, нови знаења и искуства. Се впушта во нови авантури и приказни, тежнее кон тоа, нештата да бидат подобри од претходниот пат, како и кон тоа работите да се случуваат, сега и тука.
Како и кога се роди желбата за глума?
–Ќе звучи клише ако се каже: „Од мали нозе…“, ама за волја на вистината мајка ми вели дека од мала сум ги имитирала блиските или јавните личности. Таа ме има носено на претстави во Театарот за деца и младици на мое барање-магија која освојува од прва. На шест години беше моето прво тв појавување како дете-водител на детска тв емисија, потоа следеше радио емисија. Продолжив да одам на часови во драмско студио, а паралелно бев дел од драмските секции во основно и средно училиште…
Опиши го чувството кога ќе стапнеш на штиците што живот значат (и крцкаат)!
– Не се опишува! На сцена, на улица или во некој друг простор.. секаде каде што може да се случи театар и да се игра се чувствувам слободно и исполнето. Се отвораат големи теми, се наметнуваат прашања, лебди дилемата дали постои или не постои решение, понекогаш си подзамислен и си велиш што понатаму?…
Поинтензивно е..отколку нашите приватни животи…
Можеш ли да издвоиш еден твој театарски/филмски проект кој ти е особено драг?
–Секој проект е посебна приказна. Приказна која нуди опција-себеистражување.
На кои проекти работиш моментално?
–Дел сум од актерска екипа-претстава за најмалите, работам со групи средношколци со кои разговараме за значајни теми и создаваме претстави, овој месец треба да се случи и Статуа фест на ул. Македонија, а следи и премиера на претстава која е многу значајна за мене…
Каде е и што прави Енџи во 2023 година?
–Тука некаде, уживам во тоа што се случува и што следи..
Се додека човек работи одговорно, чесно и со труд, желба и љубов, без разлика за колку и какви професии станува збор, во ред е.
